Magkaibang mundo

Sabi mo hinihintayin mo ako
Sasabay ka sa byaheng Bikol
Para punuin ang ilang oras na upo
Ng may kwenta at walang kwento

Ngunit ba't pagdating ko
Sa tagpuan nati'y wala ka na
Bakit ka nauna?
Nahuli ba ako't pinag-antay ka?

May dala pa naman sana akong pasalubong
Damit at ngiting bagay na bagay sayo
Ngunit ni salamat wala kang binanggit
Katahimikan pala'y mas nakakagalit

Paano na yung binilin mong gamit?
Kahit kay bigat para sa'yo aking binitbit
Tapos di ka pala sisipot sa usapan
Kawalan pala'y mas mabigat na pasan

Bakit di ka man lang nagpasabi
Na di ka na pala makakapunta?
Ni mag-iwan ng liham, magpaalam
Nagmamadali ka ba?

Ni babala na
Ang aabutan ko pala'y kwento't luha
At mga mukhang tulad ko'y tulala
Nangungulila sa iyong pagkawala

Ba't mo iniwan sakin
Ang trabahong mag-antay, magbilang
Ng araw, buwan, taon, dekadang kailangan
Upang malimutang mundo nati'y magkaiba pa

*Para kay Xybel