Summer 2006

Sala sa Lamig
(08.11.06)

Mula sa bintana ng ikapitong palapag
Umaapoy na paligid naaaninag
Nag-aanyayang tumiwalag
Sa karangyaang ibinansag

Ngunit kahit nakakabulag
Ang liwanag sa labas
Mamarapating malusaw
Sa init ng Inang Araw

Kesa nakakulong sa kwartong walang rehas
Nakakulom sa huwad na lamig
Napapasma, nanginginig, namamanhid
Sa hanging lumalason sa silid.

Subalit pinaghehele, inaantok
sa uyaying kanta ng makinarya,
Nilulunod, nalulunod sa ugong
ang pangungulit ng nunal sa paa.